Taith ar ddwy olwyn fuodd hi heddiw. Penderfynu ennill
rhywfaint o amser drwy feicio ar draws arfordir Cymru. Felly daeth yr hen
Peugot Camargue allan o'r sied ac ar ôl ychydig o 3-in-1 roedden ni'n barod
i fynd. Tywydd ardderchog a thaith ddiddorol. Roedd rhaid edmygu buddsoddiad
Sustrans yn creu pont i groesi'r A55 ger twnneli Penmaenmawr (llun 1), a'r
gwaith graffiti celfydd sy'n llonni'r waliau
concrit o dan y ffordd fawr ger y dref (llun 2). Ond dwi ddim yn meddwl
y baswn i'n rhoi diolch am un o'r cabanau traeth sy'n llechu fel celloedd o dan
y ffordd, yn wynebu allan at y môr.
Uchafbwynt y daith efallai oedd y llwybr bendigedig o gylch
gwarchodfa natur goediog Bodlondeb, ar gyrion Conwy. Mae'r waliau ar hyd y
llwybr yn llawn planhigion sydd wedi addasu i ymdopi â'r sychder, fel briweg y
cerrig (llun 3). Poen oedd gorfod dringo'n serth i ben ucha' Hen Golwyn er mwyn
osgoi'r llongddrylliad ar lan y môr, ond roedd yn cynnig gyfle i gael
golwg iawn ar y chwareli graean islaw'r ffordd (Llun 4).
Nid hwn efallai yw'r darn harddaf o arfordir Cymru, ond mae
'na bethau hyfryd i'w gweld yma, dim ond i chi edrych yn ofalus. Fe fwynheais
weld y gwenoliaid yn gwibio ar hyd yr afon fach y tu cefn i'r gro yn Abergele,
tinwennod y garn yn nythu ymhlith y cerrig mawr sydd wedi eu gosod i warchod y
glannau ym Mhensarn, a dail celyn môr yn ymddangos fel crinolin o ganol y
tywod ym mae Cinmel (llun 5), gyferbyn â'r parciau anferthol o garafanau
statig. A wyddwn i ddim o gwbl fod 'na eglwys bitw ar hyd y promenâd
yn Llandrillo yn Rhos.(llun 6),
Ond yr atgof pennaf efallai yw'r llu o ddynion, gyda'u
faniau gwyn a'u ceir coch, yn pysgota am ledod o'r glannau, a'r boblogaeth
anferth o gwn Tibetaidd oedd i'w gweld ar hyd y promenâd ym mhob man.
Nôl draw i Brestatyn yfory i gychwyn ar y daith i lawr y
gororau ar hyd Clawdd Offa. Edrych ymlaen yn fawr.
No comments:
Post a Comment